پی ٹی آئی رہنما مشال یوسفزئی کا بلاول بھٹو کو پیغام

اسلام آباد (فرنٹیئرنیوز) پاکستان تحریک انصاف کی رہنما مشال یوسفزئی نے چیئرمین پیپلز پارٹی بلاول بھٹو زرداری کو مخاطب کرتے ہوئے کہا ہے کہ خیبرپختونخوا میں ایمرجنسی نافذ کی جا سکتی ہے تو وہ وقت دور نہیں جب کراچی کو وفاق کے کنٹرول میں لانے کے لیے سندھ میں بھی ایمرجنسی نافذ کرنے کی نوبت آ سکتی ہے۔

سماجی رابطے کی ویب سائٹ ایکس پر اپنے بیان میں مشال یوسفزئی نے کہا کہ بلاول بھٹو زرداری کسی بھی ایمرجنسی سمری پر دستخط کرنے سے پہلے اپنے والد آصف علی زرداری کو یہ بات ضرور بتائیں۔

انہوں نے بلاول بھٹو کے اس مؤقف کا حوالہ بھی دیا کہ جب کسی ایک سیاسی جماعت کے لیے سیاسی گنجائش کم یا ختم کی جاتی ہے تو وقت گزرنے کے ساتھ دوسری جماعتوں کے لیے بھی سیاسی گنجائش سکڑنے لگتی ہے۔

انہوں نے کہا کہ پاکستان بھر میں لوگ جانتے ہیں کہ اس عمل کا آخری نتیجہ کیا نکل سکتا ہے۔ انہوں نے زور دیا کہ اب بھی وقت ہے کہ جمہوریت کو بچانے کے لیے اقدامات کیے جائیں۔

مشال یوسفزئی نے اپنے پیغام میں خبردار کیا کہ سیاسی جماعتوں کی گنجائش محدود کرنے کا عمل جمہوریت کے لیے نقصان دہ ثابت ہو سکتا ہے۔